十年人事幾番新，周海媚（海味）九八年拍罷《天地豪情》就離開了TVB開展內地市場，成為內地著名花旦。同一個十年，謝天華由dancer到組合歌手再到藝員，○六年憑《女人唔易做》中「賤Man」演技獲肯定，去年《舞動奇迹》擊敗全國高手。機緣巧合之下，兩個年代的人走在一起，卻從一巴掌開始。

情陷三角戀

劇集《學警狙擊》中，海味飾演社團阿嫂「芯姐」，為樹立阿嫂風範，她忍痛剪掉伴隨自己十多年的長髮，連監製也被她嚇倒。海味說：「我好鍾意個劇本，人性好立體，每個角色都無絕對忠和奸，現實世界人性就係咁，所以我決定要更投入，頭髮剪咗可以再長。」

劇中為暗查老公林利被殺害真相，與社團兩名要將「江世孝」苗僑偉和「Laughing哥」謝天華陷入三角戀，最終海味為愛情而犧牲。

現實中的海味卻最反對三角戀，她說：「我係一個好需要愛情嘅女人，享受愛情就唔可以一心二用。莫講話拍拖，就連拍戲亦從未試過騎兩組，太攰了，何苦難為自己。真係有嘅話咪飛起其中一個……總之唔會同時有兩個男朋友啦！」海味對愛情亦懶理世俗眼光，大方承認現任建築師男友「翻版劉翔」比她細幾歲，相處愉快北京同居，而且視對方為終身伴侶：「年齡唔係愛情嘅重點，兩個人一齊最重要心靈溝通。」

越級追師姐

或許天華受巨蟹座性格影響，愛情思想保守，婚姻生活美滿而且「零」緋聞。不過，年輕的天華亦曾試過陷入三角苦戀之中。「中五嗰年，發現女朋友有第三者，好大打擊，立即分手。」劇集裡，天華暗戀阿嫂，原來天華中三的時候亦曾暗戀中五師姐，越級挑戰，大膽求愛卻遭拒絕。

埋牙一巴掌

今次與相識多年但首次合作的天華演曖昧情人，海味立即哈哈大笑，原來第一天開工，天華就被她一巴掌摑到滿天星斗。「與天華相識多年，私底下好熟，終於有機會合作梗係開心啦！第一日開工導演就要我摑佢，一埋位乜都唔講我就嚟真『啪』一聲，天華估唔到所以呆咗，補拍第二個鏡頭時，因為佢塊面嗰五指紅印太勁要鏡頭就一就位，好誇張呀！」天華搶說：「本來我想同佢傾吓點拍，預備叫佢盡力打，點知未傾就埋位即打，我真係滿天星斗，幾乎連對白都唔識講。」

後來天華明白海媚事前故意迴避他，就是不給他機會商量，不過這很需要雙方的經驗和信任。

男女鹹豬手

早前哄動全城的電視台「魔術鹹豬手」和「Trip魔抽水」醜聞，海味坦言見怪不怪，因為她亦親身經歷過，「豬手」有男有女。她說：「幾年前喺內地拍劇，同一大班臨時演員拍外景，人逼人，突然有一怪手從後而來摸我心口，第一下以為自己敏感，導演嚟多一take，點知鹹豬手又嚟多一take喎！」海味當時怒火中燒，一手捉住隻「鹹豬手」大叫。她說：「唔可以姑息，即場叫導演和臨記阿頭處理，人贓並獲。」

另一次卻是女鹹豬手，她說：「有兩個女臨記吱吱噚研究我個胸真定假，突然擰轉頭揸落嚟，我呆咗，真係無諗過被女仔非禮，不知所措。」

海味拍三哥夢境成真

海味和天華分別拍過很多劇集，合作過的對手眾多，不少令他們欣賞和難忘。

海味講苗僑偉（三哥）：我八六年在TVB拍第一部電視劇《楊家將》，三哥當年好紅架啦，我當時只係演小角色「楊九妹」，當年見到三哥已經好希望同佢合作。果然緣分安排，廿二年後喺《學》合作，而且演情侶，感覺好似夢境成真。

海味講黃日華：咁多年同黃日華合作最多，喺香港有《義不容情》和《天地豪情》，仲有內地和台灣嘅劇集和節目都會遇到佢，華哥為人真係好老實又正直，所以同佢合作好有安全感。

天華講佘詩曼：我同阿佘喺《鐵咀銀牙》飾演一對，開拍之前好多人話唔睇好，點知播出反應好。最重要我哋始終無傳出緋聞，證明我真係絕緣體。

天華講鄧萃雯：好多人都讚我喺《女人唔易做》「賤Man」角色好出，其實對手雯女演技好勁，學到好多嘢，搞到我每日好期待開工。

文：李慧盈

攝：沈健程

場地：LaVilla38

髮型：WingWong@O4OSMOSIS（周海媚）AndesWan@04ORIENT（謝天華）